सकरी हसनपुर रेल लाइन

सकरी हसनपुर खंड पर रेल लाइन बिछाबय के काज जोर शोर सं चलि रहल अछि. नवका लाइन बिछाबय के काज अंतिम चरण में अछि. उम्मीद कएल जा रहल अछि जे काज जुलाई तक पूरा भs जाएत. एहि रेलखंड पर सकरी सं बिरौल तक के काज त जून मास तक पूरा भs जाएत. पटरी बिछाबय के काज पूरा भs गेला के बाद मालगाड़ी चला ट्रैक के बैसाबय के काजय चलत. सकरी स हसनपुर के बीच के कुल दूरी 36 किलोमीटर अछि. ट्रैक नीक जकां बैस गेला के बाद सुरक्षा जांच आओर उच्च स्तरीय निरीक्षण भेला के बाद लोक के लेल खोलि देल जाएत. ई रेल लाइन बनला सं लोक सभ के बड़ सुविधा भs जाएत. अखन बरसाइत में बाढि अएला पर लोक सभ के बड़ कष्ट उठाबय पड़ैत छनि. एकर संगहि संग दरभंगा में एकटा आओर प्लेटफॉर्म बनाओल जाएत. दरभंगा जक्शन पर पांच नंबर प्लेटफॉर्म बनि गेलाह सं लोक के कष्ट किछ कम होएत आओर गाड़ि सभ चलाबय में सेहो सुविधा होएत.

निश्चलानंद सरस्वती दरभंगा में

पूरी पीठ के शंकराचार्य स्वामी निश्चलानंद सरस्वती जी महराज 20 जून के दरभंगा आबि रहल छथिन्ह. ओ दरभंगा में 21 जून के स्वामी विवेकानंद कैंसर अस्पताल के भूमि पूजन में शामिल भs लोक सभ के आशीर्वाद देथिन्ह. पीठ परिषद के लोक सभ हुनकर आगमन के तैयारी में जोर शोर सं जुटल छथिन्ह. शंकराचार्य जी महराज 22 जून के कामेश्वर सिंह संस्कृत विश्वविद्यालय के पूर्व कुलपति डॉ जयंत मिश्र जीक रचित युगल श्री गीति मालिका ग्रन्थक लोकार्पण करथिन्ह. ओ 23 तारीख के दरभंगा महाराज जीक जन्मभूमि हरिपुर बक्शीटोल में में शंकराचार्य द्वार के उद्घाटन करताह. एहि दिन हुनकर एकटा कार्यक्रम कलुआही हाईस्कूल में सेहो छनि. एहि ठाम ओ रामसेतु रक्षार्थ आमसभा के संबोधित करथिन्ह. 24 ताऱीख के मधुबनी में रहताह. एकर बाद 25-26 जून दु दिन महिनाम में हिनकर प्रवचन छनि.

अपन दरभंगा

एम्हर ओम्हर सं लेल गेल किछ दरभंगाक फोटोग्राफ...










मंदिर राज कैम्पस, दरभंगा
















मलेच्छमर्दनी मंदिर














श्यामामाई मंदिर














मखदूम बाबा का मजार







बेला पैलेस







ललित नारायण मिथिला विश्वविद्यालय, राज कैम्पस





ललित नारायण मिथिला विश्वविद्यालय, राज कैम्पस








कामेश्वरसिंह संस्कृत विश्वविद्यालय








कामेश्वरसिंह संस्कृत विश्वविद्यालय






कामेश्वरसिंह संस्कृत विश्वविद्यालय







नरगौना पैलेस









दरभंगा राज किला









दरभंगा राज किला








ललित नारायण मिथिला विश्वविद्यालय, राज कैम्पस









ललित नारायण मिथिला विश्वविद्यालय, राज कैम्पस

कटिहार जोगबनी बड़ी लाइन

कटिहार जोगबनी रेलखंड पर बड़ी लाइन बनाबय के काज भs रहल अछि. काज अखन पूरा नहिं भेल अछि मुदा कई ठाम प्लेटफॉर्म धंसि गेल अछि त कई ठाम प्लेटफार्मक मकान में दरार पड़ि गेल अछि. फारबिसगंज प्लेटफ़ॉर्म बनतहिं धंसि गेल. अररिया स्टेशनक मकान में दरार पड़ि गेल तs पूर्णिया के प्लेटफॉर्मक सीढ़ी टूटि गेल. ओना एकर सभक मरम्मतक काज चलि रहल अछि मुदा निर्माण काज चलतहिं एकरा सभमें दरार पड़ला आ टूटला सं एकर गुणवता पर सवाल उठय लागल अछि. लोक सभ में सेहो गुस्सा छै. फारबिसगंज में तs रेलवे अधिकारी के घेराव सेहो कएल गेल. मिथिला के एहि इलाका के विकास के लेल रेल के बड़का योगदान अछि. मुदा एकर निर्माण काज में अगर कोनो तरहक कोताही बरतल गेल तs ओ खतरनाक साबित भs सकैत अछि. एहि के लेल एहिठाम लोक के जागरूक होबय के जरूरत अछि. काज पर नजर रखय के जरूरत अछि.

जानकी महोत्सव

सीतामढ़ी में 12 सं 14 मई तक जानकी महोत्सव के आयोजन कएल गेल. तीन दिन चलल एहि महोत्सव में मिथिला केर संग- संग नेपाल आओर दोसरों ठाम के हजारों लोक शामिल भेलाह. महोत्सव में हजारों के संख्या में साधु संत सेहो अएलाह. सत्संग... प्रवचन... कीर्तन सेहो भेल. तीन दिन पूरा सीतामढ़ी शहर जानकीमय भS गेल. पूरा शहर भगवद भक्ति में डूबल रहल. कइटा सांस्कृतिक कार्यक्रम पेश कएल गेल. स्कूली बच्चा लोकनि सेहो कार्यक्रम पेश कएलिह. महोत्सव के आखिरी दिन बुधवार के शहर में एकटा मनोहर झांकी निकालल गेल.
सीता मैया के जन्मस्थली होयबाक कारणे ई श्रद्धा के केन्द्र अछि. मुदा एकरा विकास के लेल जे काज होबाक चाहि से नहिं भेल अ. एहि ठाम आबय- जाय... रहय के कोनो नीक इंतजाम नहिं अछि. अगर एहि स्थान के पर्यटन स्थल के रूप में विकसित कएल जाए तs सरकार के राजस्व के प्राप्ति सेहो होएत. आओर आमदनी बढ़ला सs एहि ठामक लोकक जीवन स्तर में सुधार सेहो होएत.

दरभंगा में तारामंडल खुलत

मिथिला के सभ लोकनि के लेल खुशी के खबर अछि. अहांक अपन दरभंगा में तारामंडल बनत. अखन बिहार में सिर्फ पटना में एकटा तारामंडल छै. खबर छै जे विश्वस्तरीय... अति आधुनिक बनय वाला एहि तारामंडल पर करीब 50 करोड़ रुपया के खर्च आयत. किछ लोकक कोशिश ई छलन्हि जे ई तारामंडल मुजफ्फरपुर में खुलय. मुजफ्फरपुर बिहार के केन्द्र में छै. मुदा पढ़ाई... लिखाई... शिक्षा के क्षेत्र में आगा रहय के फायदा दरभंगा के मिलल. दरभंगा में दु- दुटा विश्वविद्यालय... ललित नारायण मिथिला विश्वविद्यालय... कामेश्वर सिंह संस्कृत विश्वविद्यालय अछि. दरभंगा मेडिकल कॉलेज आओर अस्पताल... आयुर्वेदिक कॉलेज... डेंटल कॉलेज... डब्ल्यूआईटी... पॉलिटेक्निक... पीटीएस... टीचर ट्रेनिंग कॉलेज जकां क्षण संस्थान होवाक कारणे दरभंगा के नाम आगा रहल. आओर तारामंडल दरभंगा में खोलय के फैसला कएल गेल अछि. तारामंडल के खोलय के मकसद विद्यार्थी सभ के बीच विज्ञान के लोकप्रिय बनयबाक छै.
बा नहिं सरकार के कोशिश दरभंगा में साइंस म्यूजियम सेहो खोलय के छै. अखन दरभंगा में स्टेशनक बगल में एकटा म्यूजियम अछि जाहि में कइटा दुर्लभ चीज अहांके देखय लेल मिल जायत. बिहार सरकार के तरफ सं तारामंडल खोलय के लेल प्रक्रिया शुरू कए देल गेल छै आओर जरूरी दिशा निर्देश सेहो जारी कए देल गेल छै. सरकार के एकरे संग सभ जिला में विज्ञान केन्द्र खोलय के प्रस्ताव सेहो छै.

एडुसेट सं जुड़ल मिथिला विश्वविद्यालय

ललित नारायण मिथिला विश्वविद्यालय एडुसेट सं जुड़ि गेल अछि. बिहार में एडुसेट... एजुकेशन थ्रू सेटेलाइट सं जुड़य वाला मिथिला विश्वविद्यालय पहिल विश्वविद्यालय भs गेल अछि. एकरे संग ई देश के 49वां विश्वविद्यालय अछि जतय सेटेलाइट इंटरेक्टिव टर्मिनल... एसआईटी के जरिए पढ़ाई कएल जा सकय अछि. एसआईटी के माध्यम सं सेटेलाइट सं लिंक जोड़ल जाइत अछि . विश्वविद्यालय के स्नातकोत्तर जन्तु विज्ञान विभाग में इसरो के मदद सं एसआईटी के सुविधा उपलब्ध करायल गेल अछि . अखन देश में ई सुविधा सभ आईआईटी. केन्द्रीय विश्वविद्यालय आओर बड़का मेडिकल संस्थान के पास अछि . स्थानीय एसआईटी के प्रभारी स्नातकोत्तर जन्तु विज्ञान विभाग के रीडर एम. निहाल जी के बनाओल गेल अछि . करीब ढ़ाई साल पहिने जखन पूर्व राष्ट्रपति डॉ एपीजे अब्दुल कलाम दरभंगा डब्ल्यूआईटी... महिला प्रौद्योगिकी संस्थान के उद्धाटन करय आएल छलाह तखने कहने छलथिन्ह जे ओ एहिठाम एसआईटी के सुविधा देखय चाहैत छथिन्ह. हुनकर प्रयास सं इसरो एहिठाम सभ काज तेजी सं आओर बिना पाई के उपलब्ध करौलक अछि. आब मिथिला विश्वविद्यालय देश के सभ बड़का संस्थान सं जुड़ि गेल अछि. एकर फायदा सिर्फ विद्यार्थी आओर शिक्षके टा के नहिं मरीज सभ के सेहो मिलत.

जयनगर सं गरीब रथ खुलत

गरीब रथ के लेल आब बेसि दिन तक इंतजार नहिं करय पड़त . रेलमंत्री लालू प्रसाद यादव कहलथिन्ह अ जे जयनगर सं दिल्ली जाय वाला गरीब रथ जल्दीए खुलत. लहेरियासराय के पोलो मैदान में भेल एकटा अभिनंदन समारोह में ओ कहलथिन्ह जे पटना भs क दिल्ली जाय वाला एहि गरीब रथ में मात्र पांच सय रुपया में एसी के आनंद मिलत. लालूजी इहो कहलथिन्ह जे जल्दीए दरभंगा सं मुजफ्फरपुर के बीत रेल लाइन बिछाबय के काज सेहो शुरू कएल जाएत जाहि सं दिल्ली जाय में लोक के कम समय लागत आओर मुजफ्फरपुर जनाय सेहो आसान भs जाएत. रेल मंत्री के इहो कहनाय छलन्हि जे आब बिहार के कोनो इलाका रेल सं अछूता नहिं रहत. आठ टा नवका कारखाना खोलत जाएत. हुनकर कहनाय छलन्हि जे मिथिलांचल में रेलवे के अखन आओर विकास होएत. अभिनंदन समारोह में केंद्रीय मंत्री आओर दरभंगा के सांसद अली अशरफ फातमी सेहो मौजूद छलाह.

राजनगर : योग साधना शिविर

मधुबनी के राजनगर में 16 अप्रैल सं 20 अप्रैल तक योग साधना शिविर के आयोजन कएल गेल अछि. पतंजलि योग पीठ के सौजन्य सं होबय वाला एहि योग साधना शिविर के लेल लोक सं कोनो शुल्क नहिं लेल जाएत. राज कैम्पस के दुर्गा मंदिर परिसर में योग साधना के संग चिकित्सा शिविर सेहो लागल रहत. जाहि ठाम लोक निशुल्क इलाज सेहो करा सकय छथिन्ह. योग प्रशिक्षण... हवन... भजन... चिकित्सा शिविर सभ किछ योगाचार्य वेदश्रमी जी आओर गुरुकुल के आचार्य सत्यव्रत जी के देखरेख में होयत. पांच दिन तक चलय वाला एहि शिविर के सफलता के लेल एकटा समिति सेहो बनावल गेल अछि.

मीडिया कप पर नेशनल मीडिया के कब्जा

पहिल मीडिया कप पर नेशनल मीडिया के कब्जा भ गेल. मीडिया कप क्रिकेट के फाइलन में नेशनल टीवी चैनल के टीम हिन्दुस्तान पेपर के टीम के 41 रन सं हरा देलक. ललित नारायण मिथिला विश्वविद्यालय मैदान में भेल एहि प्रतियोगिता के फाइलन में टॉस जीत कए नेशनल मीडिया के खिलाड़ी पहिने बल्लेबाजी करैत 20 ओवर में 138 रन बनौलाह. एहि में जी न्यूज के आलोक पूंज आओर न्यूज 24 के मणिशंकर 26- 26 रन बनौलाह. आजतक के प्रहलाद कुमार कीलू 18 रन ठोकलाह . जवाब में हिन्दुस्तान पेपर के सभ खिलाड़ी पूरा 20 ओवर तक पिच पर नहिं टिक सकला...आओर सिर्फ 97 रन बना सकलाह. डॉ संजय लाला 28 रन बनौलाह. 5 विकेट लेबय वाला प्रकाश झा के मैन ऑफ द मैच के खिताब देल गेल. खिलाड़ी सभ के पुरस्कार ललित नारायण मिथिला विश्वविद्यालय के वीसी श्री मिश्री लाल ठाकुर वितरित कएलथिन्ह. प्रतियोगिता के खत्म भेलाह के बाद गंगा एक्जक्यूटिव क्लब में रंगारंग कार्यक्रम के आयोजन सेहो कएल गेल. एहि मीडिया कप में भाग लय वाला सभ खिलाड़ि शामिल भेलाह. देर राति तक गीत नाद के कार्यक्रम चलैत रहल. मुदा गायक के संग-संग पत्रकार लोकनि सेहो गाना गाबि अपन प्रतिभा सं लोक के अवगत करैलथिन्ह

मैथिली पर्व

करीब एक मास तक अहां सभ सं गप्प नहिं भ सकल एहि के लेल माफ करब. व्यस्तता के कारण चाहिओ कs एम्हर देख नहिं सकलौं. मन त बड़ होयत छल मुदा किछ नहिं कs सकलौं. खैर आब फेर अहां सभ सं नियमित रूप सं भेंट होयत रहत.
मनीगाछी के आस पास रहय वाला लोक सभ के लेल एकटा नीक गप्प ई अछि जे अगिला 14 आ 15 तारीख के वाणेश्वरीस्थान में विद्यापति स्मृति पर्व समारोह के आयोजन कएल गेल अछि. समारोह के लेल जोर शोर सं तैयारी भ रहल छै. विद्यापति पर्व समारोह लेल 21 लोकक एकटा समिति बनाओल गेल अछि. समिति के संयोजक छथिन्ह डा. राम मोहन झा . समारोह में मिथिला के विशिष्ट लोक के सम्मानित सेहो कएल जाएत. एहि अवसर पर मैथिली गीत नाद के कार्यक्रम सेहो होयत

जर्जर झंझारपुर पुल

झंझारपुर में कमला बलान पर बनल रेल -सड़क पुल के हालत एकदम खस्ता भs गेल छै. एहि ठाम अक्सर कोनो न कोनो दुर्घटना होएते रहैत अछि. एकहिं संग दुनु पुल होय के कारण एहिठाम लोक के सदिखन जाम सेहो मिलैत छै. पुल पर रेल लाइन के दुनु बगल... पटरी के दुनु कात आओर बीच में लकड़ी के पटरा सभ जे कील सं ठोकल छै ओकर कील आब निकलि गेल छै. कील के ढीला भs गेला सं पटरा के एक तरफ लात पड़त त पटरा दोसर तरफ उठि जाएत. ऐना में कई बेर एहन होय छै जे मोटर साइकिल... साइकिल के चक्का पटरा के एकटा छोर सं पार भेर कि दोसर छोर उठि गेल..झुला टाइप सं. एहि सं दुर्घटना सेहो भ जाए छै. गाड़ी के बैलेंस एकदमे सं गड़बड़ा जाइ छै. कई ठाम त बड़का बड़का फांक भ गेल छै. एहि फांक सभ में कोनो गाड़ी फंसि गेल त फेर कल्याणे बुझु. लोक के सभ काम काज सेहो फंसि जाइत अछि. पुल के पाया सभ सेहो कमजोर जका लगैत अछि. एकरा पर ध्यान देबय के जरूरत अछि. जिनका पता छनि वो गाड़ी चलाबय वाला लोक सभ एहिठाम संभलि क चलैत छथि मुदा कइटा नवका लोक एहि ठाम फंसि जाइत छथि. एहि ठाम कोनो गाड़ी फंसल कि समझु बड़का जाम लागल. जाम सं कइ बेर सकरी आओर झंझारपुर के बीच रेल गाड़ी सेहो फंसि जाइ छै. आओर जखन तक रास्ता साफ नहिं भेल बैसल रहु गाड़ी में... किछ कओ नहिं सकैत छी. अगर जल्दीए एकर कोनो उपाय नहिं कएल गेल त कोनो दिन बड़का दुर्घटना भ सकैत अछि. एहि लेल पहिने सं सावधानी... सतर्कता बरतैत एकरा मरम्मत के जरूरत अछि.

मिथिला इतिहास संस्थान सम्मेलन

मिथिला इतिहास संस्थानक सम्मेलन 15-16 मार्च के ललित नारायण मिथिला विश्वविद्यालय में होएत. एहि लेल विश्वविद्यालय के इतिहास विभाग जोर शोर सं जुटल अछि. मिथिलाक इतिहास अध्ययन पर विशेष जोर देबय के लेल सम्मेलन में प्राचीन... मध्य आओर आधुनिक मिथिला पर केंद्रित आलेख सेहो राखल जाएत. एहि ठाम मिथिला में समाज आओर शिक्षा विषय पर सिंपोजियम सेहो आयोजित कएल जाएत. एकर संगहि एकटा परिचर्चा मिथिला इतिहास में मिथक किंवदंती एवं अंधविश्वास पर सेहो होएत.
सम्मेलन में मिथिला के इतिहास एवं संस्कृति सं संबंधित शोध आलेखक संग मिथिला संस्कृति सं जुड़ल लोक साहित्य के संकलन के लेल विशेष परियोजना तैयार कएल जाएत. सम्मेलन में तीन सौ सं ज्यादा प्रतिनिधि के शामिल होए के उम्मीद छै. सम्मेलन के लेल डा. विवेकानंद झा जीक अध्यक्षता में एकटा कमेटी बनाएल गेल अछि. कमेटी में प्रो. रत्नेश्वर मिश्र, प्रो. सीपीएन सिंहा , प्रो. नरेंद्र नारायण सिंह निराला , डा. धर्मेद्र कुंवर , डा. एसएन आर्या, डा. हीरानंद आचार्य , डा. अमरनाथ ठाकुर आओर डा. उषा किरण झा शामिल छथिन्ह.

बिहार... मिथिला के लेल ट्रेन

रेल मंत्री लालू प्रसाद यादव के रेल बजट में बिहार... मिथिला के लेल काफी किछ अछि. एकटा गरीब रथ दिल्ली सं जयनगर के बीच शुरू होएत जे सप्ताह में दु दिन पटना भ क चलत. नयका गाड़ी में अमृतसर-सहरसा जनसाधारण एक्सप्रेस वाया हसनपुर सप्ताह में एक दिन चलत... जयनगर-सहरसा जानकी एक्सप्रेस वाया हसनपुर सप्ताह में तीन दिन चलत... एकर संग जे दोसर ट्रेन शुरू होएत ओ अछि...
सूरत-मुजफ्फरपुर एक्सप्रेस वाया आजमगढ-छपरा (साप्ताहिक)...
दिल्ली-जोगबनी लिंक एक्सप्रेस (साप्ताहिक)...
कामाख्या-गया एक्सप्रेस (साप्ताहिक)...
मथुरा-छपरा एक्सप्रेस (सप्ताह में तीन दिन)
पुरी-दरभंगा एक्सप्रेस (साप्ताहिक)...
वास्कोडिगामा-पटना एक्सप्रेस वाया कोंकण रेलवे (साप्ताहिक)....
गया-चेन्नई एक्सप्रेस (साप्ताहिक) ...
राँची-भागलपुर एक्सप्रेस वाया क्यूल (सप्ताह में तीन दिन)...
राँची-भागलपुर वनांचल एक्सप्रेस वाया क्यूल (सप्ताह में दु दिन)
आमान परिवर्तन के बाद हाजीपुर-फुलवरिया पैसेंजर (प्रतिदिन)
एकर संग दानापुर दरभंगा के बीच चलय वाला एक्सप्रेस के जयनगर तक बढ़ा देल गेल अ. जखन कि मथुरा लखनऊ एक्सप्रेस के पटना तक क देल गेल अ. एकरे संग. अमृतसर सहरसा गरीब रथ के दु दिन सं बढ़ा क तीन दिन क देल गेल. भागलपुर राँची एक्सप्रेस आब प्रतिदिन क देल गेल अ. आओर अहमदाबाद पटना अजीमाबाद एक्सप्रेस के साप्ताहिक से दु दिन क देल गेल अछि.एहि बेर आमान परिवर्तन ... पटरी के बड़ी लाईन में जे बदलय के बात छै ओहि में पूर्णिया-सहरसा आओर सीतामढ़ी नरकटियागंज शामिल अछि

लालू के बजट

रेलमंत्री लालू प्रसाद यादव लगातार पाचम साल रेल भाड़ा नहिं बढ़ा कs एकटा रिकॉर्ड बना लेलाह अछि. मुदा रेलभाड़ा नहिं बढयबा के असर दोसर चीज पर नहिं पड़ल अछि. हुनकर रेल बजट में दोसर तोहफा सेहो छनि. भाड़ाबढ़ाबय के त बात छोडु ओ किछ घटा सेहो देलखिन्ह अ. अपन रेल बजट भाषण में ओ मेल , एक्सप्रेस आओरपैसेंजर गाड़ी के लेल 50 रुपया तक भाड़ा में एक रुपया कम करय के ऐलान कएलाह... सेकेंड क्लास में 50 रुपयासं बेसि के भाड़ा में पांच प्रतिशत के कमी होएत... एसी वन के भाड़ा में सात फीसदी आओर एसी टू के भाड़ा में चारफीसदी कमी कएल गेल अछि .
लालू जी के लोक लुभावन बजट में 10 गरीब रथ आओर 53 नब गाड़ी के संग 16 गाड़ी के रूट बढ़ाबय के घोषणाकएल गेल....एकर अलावा नई दिल्ली ... पटना ... सिकंदराबाद आओर छत्रपति शिवाजी स्टेशन ( मुंबई ) केविश्वस्तर के स्टेशन बनाबय के वादा कएल गेल . रेल बजट में वरिष्ठ नागरिक...अशोक चक्र पाबय वाला सैनिक... एड्स पीड़ित के संग छात्रा सभ के रियायत के घोषणा कएल .. एकर संग रेलवे के फोर्थ ग्रेड में लाइसेंसदारी कुली केभर्ती कएल जाएत... आब अहां नेट के संग संग मोबाइल सं सेहो टिकट बुक करा सकय छी.
बिहार के नवीनगर में 1000 मेगावाट के बिजली कारखाना के लेल एनटीपीसी सं करार कएल गेल आओऱ रेलवे केजमालपुर कारखाना के आधुनिकीकरण सेहो कएल जाएत.

समस्तीपुर में आलू प्रसंस्करण उद्योग

समस्तीपुर में आलू प्रसंस्करण उद्योग लागत. हाले में कोलकाता में पोटैटो एक्सपो भेल रहय ओकर बाद सं समस्तीपुर में आलू आधारित उद्योग लगाबय में कइटा उद्योगपति सभ दिलचस्पी देखलखिन्ह अ. ई बात एहि ठामक किसान के लेल खुशी के बात छै. एहि सं ओ आओर मेहनत करताs आओर हुनका अपन उपज... पैदावार के सही कीमत सेहो मिलतन्हि. खबर छै जे रिलायंस सेहो एहि में अपन रुचि दिखएलक अ. आलू उपजाबय के मामला में बिहार के स्थान देश में तेसर छै. एकर संगे बिहार के आलू नीक क्वालिटी के सेहो होइ छै. बिहारक माइटक असर छै जे एहि ठामक आलू दोसर ठाम सं बेसि स्वादिष्ट होइ छै. मुदा अपना एहिठाम बिहार... मिथिला में आलू के उपयोग मात्र सब्जी... तरकारी लेल होइत अछि. अखन धरि एकर प्रोसेसिंग नहिं के बराबर भs रहल अछि. एकटा बात आओर छै भने बिहार पैदावार के मामला में तेसर स्थान पर छै... मुदा प्रति कट्ठा... एकड़ उत्पादन देखल जाय तs ओ दोसर ठाम सं कम छै. एकर लेल राजेन्द्र कृषि विश्वविद्यालय के कृषि वैज्ञानिक सभक सहयोग सं नीक वेरायटी के आलू के पैदावार के कोशिश कएल जा रहल छै. उम्मीद छै जे जल्दीए आलू के पैदावार में बढ़ोतरी होएत आओर किसान भाई के सेहो फायदा मिलतन्हि.
समस्तीपुर तरकारी... सब्जी उत्पादन के मामला में बिहार में सभ सं आगा रहल अ. आओर समस्तीपुर एकटा बड़का सब्जी मंडी में सेहो तब्दील भ रहल अछि. एहि ठामक तम्बाकू ... खैनी सेहो दुनिया भर में नाम कमौने अछि. एहि ठाम सं तरकारी बिहार के कोना कोना में बेचल जाइत अछि. मुदा एहि ठाम एतेक बड़का स्तर पर सब्जी के खेती होयतो एकोटा उद्योग नहिं अछि. अगर प्रसंस्करण उद्योग के बात आगां बढैत अछि तs ई एहिठामक लेल एकटा बड़का बात होयत .